Айсен Николаев Уус Алдаҥҥа мелиорация боппуруоһун кэпсэтэр

14:36
28 июля 2018

Бүгүн, ол эбэтэр от ыйын 28 күнүгэр Айсен Николаев Уус Алдан улууһугар үлэлиир. «Куоһаҕас» уу хаһаанар сирин, «Илин үрэх» быһыты көрөн баран  тута  сири оҥоруу (мелиорация) уонна ууну ыһар бөлөҕү үлэлэтии туһунан көһө сылдьар мунньаҕы тэрийэн ыытта.

Мунньахха Айсен Николаев:  «Тустаах боппуруос тыа хаһаайыстыбатын сайдыытыгар тыын суолталаах. Бу салааҕа номнуо балай да үлэ ыытылынна, ол эрэн билигин сири оҥорууга, ходуһалары дэхсилииргэ саҥалыы көрүү наада», - диэн эттэ.

Саха сиригэр сири оҥоруу үлэтэ федеральнай бүддьүөттэн үбүлэнэрин ситиһиэххэ, маны таһынан аныгы олох сиэринэн сири оҥоруу саҥа ньымаларын булан тобулуохха наада диэн бэлиэтээтэ.

«Сири оҥоруу үлэтин ыыппакка эрэ, бэйэ бородууксуйатын оҥорон таһаарыыга уонна тыа хаһаайыстыбатын сайдыытыгар үрдүк көрдөрүүлэри ситиспэккин. Тыа хаһаайыстыбатын салаатын сайыннарыыга туспа анал көрүү ирдэнэр», - диэн Айсен Николаев эбэн эттэ.

Ону тэҥэ мунньахха өрөспүүбүлүкэҕэ баар тыа хаһаайыстыбатын сирдэрин туруктарын уонна ходуһа иэнин улаатыннарар туһунан боппуруостары таарыйдылар.

Мунньах кэннэ Кэптэнигэ  «Дьиэрэ» бааһынай хаһаайыстыба сайылыгын, Лөгөй орто оскуолатын, Хомустаахха квартальнай хочуолунайы көрүөҕэ. Киэһэ улуус социальнай-экономическай сайдыытыгар мунньах ыытыаҕа.