БЭДЬИМЭҔЭ ИННОКЕНТИЙ КОРЯКИН ОККО БЭЛЭМ

14:04
10 июля 2018

Мэҥэ-Хадҥалас улууһун Бэдьимэ нэһилиэгин олохтооҕо, үлэ бэтэрээнэ  Иннокентий  Корякин окко киирэргэ бэлэмнэммитэ ыраатта. Тиэхиньикэтин төһө кыалларынан тупсарар. Волокушалаах “Беларус”, кытай “Синтай”, “Т-25” тыраахтардаах. От мунньардаах, охсордоох уонна бэйэтэ оҥостубут тиэйэрдээх. 

Иннокентий ынах-сүөһүнү ииппитэ ырааппыт. Билигин 16 сүөһүлээх, 20  сылгылаах. Бэйэтигэр үс оттуур алаастаах, үс алааһы дьонтон уларсар.

‒ Окко киирэргэ от ыйын 25 күнүттэн кыралаан бэлэмнэнэ сылдьабын. Туттар тиэхиньикэбин көрүнэбин, мунньар тиистэрин көннөрдүм, охсорбун сытыылаатым, онон от үлэтигэр бэлэммин. Күн-дьыл туругун кэтиибин. Алаастарбын, ходуһаларбын кэрийэбин, үүнүү мөлтөх. Уу кэлбит сиринэн, хойуу, курааннаабыт өртө халтаҥ. Аһыыҥка туруох курдук.

Иннокентий Иннокентьевич былырыын пресс-подборщик атыылаһан от үлэтэ биллэ чэпчээтэ. Быйыл ойоҕос от мустарар ылыммыт.

От ыйын 16 күнүттэн киирэр санаалаах. Быйыл алта алаастан быһа холоон 36-38 туоннаны оттуон баҕарар. Ааспыт сылга алта алаастан 34 туоннаны ылбыт.  Оттууругар оҕолоро, күтүөттэрэ, сиэннэрэ уонна быраат сиэннэрэ көмөлөһөллөр. Күн-дьыл туруга үчүгэй буоллаҕына, ардах мэһэйдээбэтэҕинэ, атырдьах ыйын 20 күнүгэр диэри бүтэрэр соруктаах.

Ааптар: Яна АРТЕМЬЕВА.