ДЬААҤЫГА СҮӨҺҮНҮ БУОҺАТЫЫГА УОПУТТААХ ИСПИСЭЛИИС ҮЛЭЛИИР

16:59
28 июня 2018

Дьааҥыга «Тымныы оройо» ТХПК племенной үлэҕэ, сүөһүнү сиэмэлээһиҥҥэ улахан болҕомтотун уурар. Ыам ыйыттан, дириэктэр Екатерина Портнягина көрдөһүүтүнэн, Дьааҥы улууһугар «Сахаплемобъединение» ААУо-тан техник-осеменатор Мария Габышева кэлэн үлэлиир.

Мария Семеновна «Тымныы оройо» кэпэрэтиип ынахтарын буоһатта, биир ый устата ыанньыксыттаата, тыа хаһаайыстыбатын үлэһиттэригэр элбэх туһалаах сүбэни-аманы биэрдэ. Сүүрбэччэ сыл ыанньыксыттаабыт, өр сылларга идэтинэн үлэлээбит уопуттаах исписэлиис кэлиҥҥи сылларга осеменатордары үөрэтэр. Саҥа боруоданы үөскэтэн таһаарыыга туттуллар сиэмэлээһин ньымата Саха сиригэр киэҥник ыытыллар эбит.

— Соҕурууттан кэлбит красностепной, хара эриэн, холмогуор боруодалар сиэмэлэрэ тарҕанан, өлгөм үүттээх, төрөлкөй боруода сүөһүлэр төрүүллэр. Холобура, улуустарга буоһатыы үлэтэ барбатаҕына, уруурҕаһан, былыр былыргыттан тутуллубут сүөһүлэр бары бороохтуйан, кыччаан хаалаллар, хаан уларытыытыгар симменталынан буоһатыыны ыытабыт. Сиэмэни племхолбоһук кыһыны быһа ылар, сороҕун соҕурууттан атыылаһар. Үс сыл буола-буола атыыр оҕус сиэмэтэ уларыйыахтаах. Дьааҥыга номнуо төрдүс сылын буоһатыы тэриллэр, билигин Добрай диэн оҕус сиэмэтэ туттуллар. Эһиил оҕуһу уларытыахтаахпыт, — диэн кэпсээтэ Мария Семеновна.

Ааптар: Боотто АСХААРАП, Дьааҥы.