Тыа хаһаайыстыбатын миниистирэ Александр Атласов өрөспүүбүлүкэ олохтоохторун Үрүҥ Тунах ыһыаҕынан эҕэрдэлиир

10:48
21 июня 2018

Ытыктабыллаах тыа сирин олохтоохторо, тыа хаһаайыстыбатын үлэһит дьоно!

Саха Өрөспүүбүлүкэтин тыатын хаһаайыстыбатын министиэристибэтин уонна тус бэйэм ааппыттан эһигини, Саха сирин бары олохтоохторун, Дьыл эргиирин биир ураты кэрэ, астык кэмэ – самаан сайын сайгыччы салаллыбытынан, Үрүҥ Тунах Ыһыаҕынан итиитик-истиҥник эҕэрдэлиибин!

Биһиэхэ, сахаларга, сайын кэлиитин биир тутаах бэлиэтинэн ыһыаҕы ыһыы буолар. Өбүгэ саҕаттан салаллан, түҥ үйэлэртэн түмүллэн тиийэн кэлбит Улуу Ыһыахпыт биһиэхэ ытык өйдөбүллээх үгэс буолар. Бу бырааһынньык биһигини, XXI үйэ дьонун, бары ааспыт көлүөнэ өбүгэлэрбитин кытта ситимниир ураты дириҥ ис хоһоонноох, киэҥ суолталаах.

Итиэннэ күөх чээлэй сайын барахсан, киһи дууһатын үөрдэр, олох дьолун толору тыынынан ылар саамай астык дьоро кэм буолар. Дууһалыын тэнийэн, сырдаан, күөҕү айхаллаан үйэлэр тухары төһөлөөх тойуксут, олоҥхоһут өлбөт-сүппэт кэрэ, уостан түспэт ырыаны ыллаан, тойуктаан, олоҥхолоон ааспытай!

Сайын биһиги тыйыс айылҕалаах Сахабыт сиригэр бүтүн олохпутун түстүүр эппиэтинэстээх кэммит буолар. Дьыл баара-суоҕа 2-3 ыйын иһигэр биһиги, тыа сирин олохтоохторо, олох оҥкулун охсубут сүөһүбүт – олохпут сүрүн эргийэр үөһүн, аһы-үөлү, таҥаһы-сабы биэрэригэр, төрүүрүгэр-ууһууругар ирдэниллэр кыстыыр отун оттуубут. Оттооһун таһынан хас сайын аайы дьыл тахсар туһугар өссө атын хаһаайыстыбаннай соруктары эмиэ толоробут.

Быйылгы дьыл биһиэхэ, тыа хаһаайыстыбатын салаатын үлэһиттэригэр, биир ураты суолталаах кэм буолар. Билэрбит курдук, чиҥ, бөҕө акылаат түһэриттэн салгыы туруктаах үлэ-хамнас улахан тутулуктаах. Бу ураты сыалы-соругу таба өйдөөн, тыа хаһаайыстыбатын салаатын бары кыттыылаахтара, үүммүт сайын дьоһуннук дьаһанан уйуктаах, бөҕө олугу охсорбутугар баҕарабын. Бары биир санаанан, эйэ-дэмнээхтик, эрчимнээхтик ылсан үлэлиэхпитигэр эрэнэбин.

Биһиги Сахабыт сиригэр тыа хаһаайыстыбатын ураты сөҕүмэр үрдүк ситиһиилэрин аныгы үйэ үлэһит дьоно симэлиппэккэ  күөрэйэр өрөгөйдөөх, тохтубат тускуллаах, дэлэйэр кэскиллээх, самныбат саргылаах үрдүккэ көтүтэр туһугар түмсүөххэйиҥ, саҥа үйэ айхаллаах аартыгын арыйыаххайыҥ. Тыа хаһаайыстыбатын министиэристибэтэ бу киэҥ далааһыннаах үлэҕэ көҕүлүүр, сирдиир суолталаахтык үлэлиир, күүс-көмө буолар.

Сахабыт Сирин бары чулуу үлэһит дьонугар, сэрии, тыыл үлэтин уонна тыа хаһаайыстыбатын бэтэрээннэригэр самаан сайын үүммүтүнэн, күөххэ этэҥҥэ үктэммиппитинэн, кэлэр дьылы түстүүр түгэҥҥэ киирбиппитинэн ис сүрэхтэн истиҥник эҕэрдэлээн туран, мындыр үлэһит өбүгэлэргит суолларынан илэ үктэнэн, батыһан, тыа хаһаайыстыбатын салаатын сайыннарыыга, тыа сиригэр олох уйгутун тупсарыыга ураты кылааккыт иһин истиҥник махтанабын!

Эһиэхэ ыһыахха сиэр-туом быһыытынан ытык дьон арчытын, алгыһын ылынан, саҥа үүммүт сылга ыраастанан, тыыҥҥыт уһаан, көхсүгүт кэҥээн, хараххыт сырдаан, былыккыт ырааһыран олох инники күөнүгэр чөл туруктаах, ириэнэх өйдөөх, кэнчээри ыччаккытын кытары иллээхтик-эйэлээхтик, толору дьоллоохтук уһуннук, бигэ итэҕэллээхтик олороргутугар баҕарабын!

Дьол-соргу тосхойдун, үтүө үөмэхтэстин, ситиһии кыттыстын, чөл турук тулалаатын!

           

Ытыктабылы кытта, Саха Өрөспүүбүлүкэтин Тыатын хаһаайыстыбатын миниистирэ                

 А. П. Атласов